袁國勇團隊研發噴鼻新冠疫苗　獲准內地緊急使用

2022年12月06日 12:34 赞好

政府專家顧問、港大微生物學系講座教授袁國勇嘅團隊，聯同北京萬泰生物及廈門大學，合作研發嘅噴鼻式新冠疫苗，已經獲批喺內地緊急使用，萬泰將喺未來生產2億劑疫苗，又等緊香港政府批准使用。

袁國勇話，噴鼻式疫苗可阻止病毒進入鼻腔及咽喉粘膜，如果曾接種滅活疫苗，再接種噴鼻式疫苗對Omicron變種病毒可達80%保護力，而未接種疫苗嘅亦有55%保護力。

同樣係團隊成員嘅港大微生物學系教授陳鴻霖就話，噴鼻式疫苗係現時較佳嘅補充劑，小朋友驚打針亦更易接受。