Crostini突結業 海關收過百投訴拘捕創辦人黃光輝
2022年09月22日 17:33
連鎖西餅店Crostini上星期突然結業，有大量顧客結業前購買咗餅卡無法兌換，海關表示高度關注事件，收到過百宗投訴，今早以涉違反《商品說明條例》拘捕公司55歲男董事，據指係公司創辦人黃光輝。
海關商品說明調查科總貿易管制主任雷毅權表示，接獲104宗投訴，涉及5300張餅卡，總共27萬元，最大一宗嘅苦主損失1.75萬，有受害人上月底仲有向公司購買餅卡，有效期由今年底至2025年。
海關仍在調查事件，唔排除更多人被捕，並呼籲有購入餅卡嘅人士，盡快向海關提供資料。至於有份推銷嘅員工會否犯法，海關指要視乎佢哋嘅工作崗位及角色。
