日本宣布10月11日恢復自由行 取消入境人數限制

2022年09月23日 11:36 赞好

日本首相岸田文雄琴日宣布，日本將會喺10月11日恢復免簽證入境，旅客可自由行，同時取消入境人數限制，即日本再無任何入境限制措施。

岸田文雄又表示，會喺10月同時制定經濟措施，包括重啟刺激國內旅遊嘅補貼計劃，目標係振興日本旅遊業。

由於美國不斷加息，導致美元強勢，日圓大幅貶值，相信有利吸引外國旅客，不過，岸田文雄亦指，會密切關注匯市，對於過度波動嘅情況，會果斷採取必要措施。日本政府琴日入市購入日圓，係1998年來首次，岸田嘅表態，或代表日本政府將再次入市干預匯價。