內地金融公司盛大金禧疑爆雷 官網竟高調承認跑路

總部位於湖南長沙嘅金融服務公司盛大金禧資不抵債，傳近200億資金無法兌現，董事長不知所蹤，客戶未能收取分紅及本金，而盛大金禧官網竟刊登文章，高調承認「走佬」，更教訓客戶，唔好再貪圖高息。

盛大金禧投資客戶超過十萬人，有近200億投資額，曾聲稱每年有16%回報，董事長盤繼彪失蹤前，仲出席會議，話無諗過轉移資產，帶款潛逃，之後盤繼彪失蹤嘅消息傳出後，旗下喺香港上市嘅公司金禧國際更一度大跌44%。

最令人奇怪嘅係，盛大金禧日前高調喺官網刊登文章，承認「走佬」，更話錢已被專業團隊洗乾淨，目前人喺國外，又無辦法引渡，更諷刺投資者唔好再貪圖高息。