金冬雁倡連續快測三天取代核酸 內地疫情爆發機會較高

2022年12月09日 11:56 赞好

近日香港疫情再度升溫，但香港大學生物醫學學院教授金冬雁認為，疫情只係微升，整體仍然平穩，好多市民已自然感染及接種疫苗，疫情預料唔會一直升溫。佢又建議減少強制核酸檢測，改為快測，如果唔係，唔同人群去檢測嗰陣，好容易造成交叉感染。

內地近日逐漸放寬防控，金冬雁預計，內地爆發疫情嘅機會較高，唔贊成一次過喺冬季放寬防疫，佢認為，內地最重要係以保護醫院及長者為最高目標，守好防線。

至於內地部分地方取消健康碼，香港應唔應該跟隨，佢就認為，疫苗通行證措施無助鼓勵長者接種疫苗，香港仍有11萬80歲以上長者從未接種，成為疫情最大隱憂，當局應考慮變招。