英國十萬護士罷工 首相辛偉誠擬立「反罷工法」

2022年12月16日 12:29 赞好

英國最大護士工會「皇家護理學院」琴日發動大罷工，估計近十萬名護士參與，影響咗最少76間醫院，有幾千個手術同埋幾萬個門診預約要取消，工會下星期二會再發動一次罷工，而又準備下月再進行。

事件原因喺薪酬問題，工會認為加薪4%未能追及通漲，要求加薪19%，又話罷工係最後手段，有慈善機構擔心，罷工會令癌症病人嘅治療被取消，令佢哋更快離世。

英國近日多個行業都發動罷工，首相辛偉誠就話，希望工會明白，工潮擾亂民眾生活，聖誕期間影響更大，促請各工業取消行動，又計畫下年提出反罷工法，保障民眾生活。