感冒藥斷市 海關指北上人士不可帶大量止痛藥出境

內地下個月8號全面開關，但因為疫情嚴重，導致香港嘅感冒藥都斷市。海關助理關長吳潔貞今日就話，旅客北上嗰陣要留意攜帶嘅物品係唔係受管制，根據條例，止痛藥屬於藥物，除非係可豁免嘅合理自用數量，唔係就要有出口許可證，先可以帶離境。

被問到幾多屬於合理自用，吳潔貞話，旅客帶幾盒通常可以豁免，但如果每人帶一、兩箱，就唔算合理自用數量。吳潔貞又話，海關重視兩地恢復通關，正進行連串準備工作，確保通關暢順。