疫後首次百人遊行須戴號碼牌 監警會成員稱可理解

有將軍澳居民組織琴日舉行反區內填海遊行，幾十名居民參與，係疫情之後首個遊行，參加者要戴上號碼牌作識別，有監警會成員話可以理解。

監警會成員陳錦榮話，警方考慮到如果遊行有額外發展，可能會觸犯國安法，有額外要求可以理解，但佢認為今次考慮條件唔會應用到所有遊行，警方可以加強向公眾解釋決定。

有將軍澳居民不滿厭惡性設施集中喺將軍澳132區，西貢區議員方國珊話，起好跨灣大橋以及將藍隧道，已經縮短咗九龍同將軍澳嘅距離，唔一定要喺將軍澳設廠。