傳專線小巴業輸入500外勞 李家超稱會保障本地就業

2023年04月04日 12:10 赞好

近日有傳政府考慮輸入外勞，首先會喺運輸業以及建造業。特首李家超今日話，如果最終考慮輸入人力，外勞工資唔會低過香港入息中位數，佢強調會保障本地就業。不過，有職業司機工會就反對輸入外勞。

李家超話，政府關心香港人力需求問題，要令香港有競爭力同世界比拼，強調會保障本地就業，加強再培訓計劃以及職專培訓。

有傳專線小巴行業會率先輸入外勞，的士小巴商總會理事長周國強就話支持，佢又話，當局亦暗示過會輸入500人，但業界缺乏超過1000名司機，佢建議俾外勞司機先喺關口路線工作，方便佢哋往返兩地。但汽車交通運輸業總工會就擔心，做法會「打爛」香港工人飯碗，又擔心外勞冇法勝任香港複雜嘅路況。