西九法院調亂被告還押犯逃脫 警方拘二人涉誤導警員

2023年04月11日 16:12 赞好

西九龍裁判法院今日發生罕見「走犯」意外，一名販毒案被告提堂後需要還押，但過程中身份疑被調轉，變成可以保釋離開，原來販毒案被告疑收買其他案件嘅被告，等佢可以調轉身份逃走。

警方之後拘捕答應被調包嘅男子，以及逃走被告嘅妻子，二人涉嫌誤導警員，而逃走嘅被告仍然在逃。據指，37歲販毒案被告原本提堂之後需要還押，但佢喺羈留室說服另一名24歲嘅打鬥案被告，承諾支付費用，雙方之後交換身份證以及手帶，辦理保釋手續之後，37歲男子逃走，有關人員發現後即時追捕，但最後都唔成功，案件由深水埗警區刑事部接手跟進。