政府擬禁即棄手套 官員稱可不戴手套處理食物

2023年04月26日 13:01 赞好

政府最快今年年底會禁止銷售及提供即棄膠餐具，而第二階段就會禁止銷售即棄膠枱布、非醫用即棄手套等等。有議員關注處理食物嗰陣點樣唔用手套，當局就建議用醫療手套代替，或者選擇唔用。

環保署署理副署長鄭健話，可以用醫用嘅乳膠手套整蛋糕，或者選擇唔戴手套。不過，草案委員會主席盧偉國就認為唔符合現實，佢話，戴著咁厚嘅手套加工食物，點樣行得通，又指飲食業會認為係匪夷所思。

鄭健就回應，同意喺衛生上面，替代品未必能完全代替透明手套，所以管制手套係第二階後，希望吸納社會意見再尋找替代品。