日本四青年搶劫銀座錶行 1小時後被捕

日本東京銀座昨日發生搶劫案，4名賊人光天化日之下，闖入一間高級錶鋪，搶走百幾隻手錶之後逃去，不過警方之後拘捕四人，發現佢地只有16至19歲。

從網上片段所見，有三人戴著面具，闖入一間鋪頭，有一名女途人用手機拍攝影片之餘，更試圖阻止賊人逃走，但最後失敗，三人之後坐上一架私家車逃去。

之後警方喺港區赤坂一個公寓發現涉案私家車，最終喺一個單位拘捕4人。有傳媒報導，話4名賊人唔係主謀，而係受僱打劫，警方就話因為通訊軟件有加密，相信難以搵出幕後黑手。