美國發行25美仙硬幣 華人女星黃柳霜成為硬幣肖像

2022年10月20日 16:01 赞好

美國將喺24號發行全新嘅25美仙硬幣，其中一款硬幣肖像，就係已故華人女星黃柳霜，佢成為咗首位登上美國貨幣嘅華人，今年亦係佢擔任電影女主角嘅100周年。

依枚硬幣一面係美國國父華盛頓，而另一面就係黃柳霜。鑄幣局局長吉布森話，黃柳霜係勇敢嘅倡導者，克服咗嗰個時代嘅多重挑戰，提升亞裔演員嘅地位，為後人開拓演藝事業。

黃柳霜1905年喺美國出生，係第三代美籍華人，佢喺1919年開始參與荷里活電影，黃柳霜1922年喺電影《海逝》擔任女主角大放異彩，當時美國禁止唔同種族通婚同埋親密接觸，因為法律限制，佢往後失去好多機會，1930年之後，佢淡出荷里活，轉往歐洲發展，1961年，年僅56歲嘅黃柳霜因心臟病發去世。