美国发行25美仙硬币 华人女星黄柳霜成为硬币肖像

2022年10月20日 16:01 赞好

美国将喺24号发行全新嘅25美仙硬币，其中一款硬币肖像，就系已故华人女星黄柳霜，佢成为咗首位登上美国货币嘅华人，今年亦系佢担任电影女主角嘅100周年。

依枚硬币一面系美国国父华盛顿，而另一面就系黄柳霜。铸币局局长吉布森话，黄柳霜系勇敢嘅倡导者，克服咗嗰个时代嘅多重挑战，提升亚裔演员嘅地位，为後人开拓演艺事业。

黄柳霜1905年喺美国出生，系第三代美籍华人，佢喺1919年开始参与荷里活电影，黄柳霜1922年喺电影《海逝》担任女主角大放异彩，当时美国禁止唔同种族通婚同埋亲密接触，因为法律限制，佢往後失去好多机会，1930年之後，佢淡出荷里活，转往欧洲发展，1961年，年仅56岁嘅黄柳霜因心脏病发去世。