外來人才計劃要申報刑事記錄 議員建議外傭睇齊

2023年02月27日 16:31 赞好

內地科學家賀建奎因為基因編輯被判監3年，但仍然成功申請高才通簽證，之後政府撤銷佢嘅簽證申請，再要求所有人才計劃申請者要申報刑事記錄，立法會議員江玉歡今日建議，外傭都要申報刑事記錄。

佢話，外傭要照顧老幼，唔應該屬於例外，佢建議入境處可以按刑事情況設立豁免範圍，相信行政上唔會困難。

不過，有外傭公會就話，外傭唔會有永久居留權，要求睇齊唔公平，過去一直冇申報都行之有效，江玉歡就認為，等到有問題先調整就為時已晚。