楊紫瓊轉文章批奧斯卡太白 提對手涉違規拉票或受罰
2023年03月10日 16:53
馬來西亞華裔演員楊紫瓊主演電影《奇異女俠玩救宇宙》，奪得多個國際獎項，亦都入圍咗下星期一舉辦嘅奧斯卡頒獎禮，競逐最佳女主角，但近日楊紫瓊就喺社交媒體轉載文章，批評奧斯卡嘅賽果「太白」，當中提及同樣入圍嘅對手姬蒂白蘭芝，觸犯咗候選人唔可以標示對手個名嘅規則，或會受罰，目前楊紫瓊已刪除文章。
楊紫瓊轉載時尚雜誌《Vogue》嘅一篇文章，當中提及奧斯卡20幾年都係白人女性封后，而姬蒂白蘭芝已經兩奪奧斯卡，文章認為楊紫瓊更值得奪今次最佳女主角。奧斯卡主辦單位未有回應事件。
《奇異女俠玩救宇宙》令楊紫瓊獎項大豐收，佢先後獲金球獎、獨立精神獎以及美國國家影評學會嘅最佳女主角，亦有份角逐今屆奧斯卡最佳女主角。
