嗶哩嗶哩分成下降 「B站UP主」停更稱虧錢

2023年04月04日 14:29 赞好

內地影片分享平台嗶哩嗶哩近日有唔少創作頻道停止上載新影片，有人話平台分成大幅下降，收入減少嘅情況下，冇得賺錢，甚至蝕錢，只能夠停止更新。

有200萬粉絲嘅頻道「花都兄弟」上載影片宣布停更，主要做美食影片創作嘅佢哋，話因為收入減少，食材開支大，決定放棄，另外又有創作者話，受到短片衝擊，以及有唔少頻道係公司包裝嘅帳號，製作成本低，令個人創作者難以生存。

根據嗶哩嗶哩嘅業績顯示，營業總成本有一半係分俾創作者，雖然收益有上升，但未能跟上流量增速，可能因為咁減少分成。