21歲美國飛行員被捕 涉洩漏美軍機密情報

2023年04月14日 12:41

美國近日一批軍事機密文件喺網上洩漏,當中包括俄烏戰爭嘅情報。美國聯邦調查局拘捕一名21歲叫做特謝拉嘅國民警衛隊飛行員,佢涉嫌散布國防機密資訊。報導話,特謝拉為左向網友炫耀自己得到最新嘅軍事資訊,而喺網上發布有關文件。

特謝拉係一名軍事迷以及遊戲迷,活躍喺網絡世界,佢2022年成為空軍一等兵,可以獲得戰場上嘅一手消息,佢有時會預先向網友公布消息,之後等新聞報導之後,佢就會因為提早預告而得到掌聲,網友亦視特謝拉為「最接近戰場嘅人」。

有認識特謝拉嘅網民話,特謝拉並冇惡意,佢只係想向網友表明身份,之後可能覺得口述資訊令人印象唔深刻,所以將機密文件影相放上網,但文件逐漸散布出去,特謝拉先意識自己犯下大錯,於是關閉帳戶。特謝拉宜家面臨緊幾十年監禁嘅控罪。

相關新聞