21岁美国飞行员被捕 涉泄漏美军机密情报

2023年04月14日 12:41 赞好

美国近日一批军事机密文件喺网上泄漏，当中包括俄乌战争嘅情报。美国联邦调查局拘捕一名21岁叫做特谢拉嘅国民警卫队飞行员，佢涉嫌散布国防机密资讯。报导话，特谢拉为左向网友炫耀自己得到最新嘅军事资讯，而喺网上发布有关文件。

特谢拉系一名军事迷以及游戏迷，活跃喺网络世界，佢2022年成为空军一等兵，可以获得战场上嘅一手消息，佢有时会预先向网友公布消息，之後等新闻报导之後，佢就会因为提早预告而得到掌声，网友亦视特谢拉为「最接近战场嘅人」。

有认识特谢拉嘅网民话，特谢拉并冇恶意，佢只系想向网友表明身份，之後可能觉得口述资讯令人印象唔深刻，所以将机密文件影相放上网，但文件逐渐散布出去，特谢拉先意识自己犯下大错，於是关闭帐户。特谢拉宜家面临紧几十年监禁嘅控罪。