2023年04月17日 11:53
記錄片《給十九歲的我》琴晚奪得金像獎「最佳電影」。早前記錄片捲入上映風波，有參與拍攝嘅女仔反對公開上映，最後電影停止公映，但金像獎就話，無權力取消記錄片參與評審，而最後《給十九歲的我》大熱獲獎。
風波之中嘅眾矢之的導演張婉婷冇出席頒獎禮，另一聯合導演郭偉倫有上台領獎，另外有份參與記錄片嘅三名女學生馬燕茹、倫凱頤以及羅曉淳亦有出席，郭偉倫得獎時就話，唔好驚拍記錄片，唔好熄機，要繼續拍，拍咗先算，剪咗先算，上映左先算。
另外佢又讀出張婉婷嘅信，張婉婷話，佢嘅伴侶羅啟銳死亡嘅黑洞，到記錄片面世，令佢有一個可以栽種美麗植物嘅小花園，但風波令佢又墮入黑森林，令佢領悟到人生無常，張婉婷又感謝一直支持佢嘅人，參與拍攝嘅同學以及英華前校長李石玉。