新學年5間小學不獲批開小一 蔡若蓮稱開班線不能再降

多間學校未有獲教育局批准喺新學年開辦小一，教育局局長蔡若蓮今日話，有5間小學收生不足，新學年唔獲批開辦小一，但佢話，唔係「殺校」，校方有唔同方案選擇，包括合拼、改為私營模式開班。

部分小學只差一人就可以開班，但蔡若蓮話，開班線已經由24人減至16人，不宜再下降，否則會影響學生群育發展，佢又話，不論開班線訂喺邊個人數，都可能出現差一人嘅情況，反問「幾多先算近人情」。

對於部分學校選擇合拼，蔡若蓮話，辦學團體要考慮校舍容量以及處理教師團隊，當局會幫助唔願去新校升學嘅學生，搵合適學校。