妇女会取消游行 有社运人称陌生帐号涌现鼓励上街

2023年03月09日 11:41 赞好

香港妇女劳工协会原定上星期日游行争取妇女权益，但最後突然取消，有报导话，警方曾向协会提到，担心游行变质，更引用社交媒体嘅帖文，而有社运人士话，突然大量陌生帐号涌入，留言要求当日上街，「迫爆修顿」，而当游行取消之後，依啲陌生帐号就消失。

前区议员张锦雄话，喺佢转发游行信息之後，大量「平时从唔点赞留言嘅人涌入，纷纷话要逼爆修顿」，当中包括一个叫做黄芷晴嘅帐号，而依个帐号嘅头像，系盗用一名澳门保险公司嘅管理层相片。多名社运人士包括梁锦威丶赵恩来以及周嘉发嘅专页都话有同样情况。

有传媒亦发现，一个叫做Vivian Chan嘅帐号多年来都喺建制派专页留言撑警以及投诉前议员许智峯，但突然到多个专页鼓励上街，警方早前话，网上有「暴力团伙」响应游行，而特首李家超亦都讲过，如果组织唔能够确保游行安全，就唔应该举办游行活动。